Utafiti: uzoefu wa wazee wanapotumia huduma za afya

Karibu, na asante kwa kushiriki katika utafiti huu wa WHO kuhusu huduma bora za afya kwa wazee.

Majibu yako yatasaidia kuandaa viwango vya kimataifa vya huduma bora za afya na utunzaji kwa watu wazee.

Utangulizi

Duniani kote watu wanaishi kwa muda mrefu zaidi. Hivyo huduma za afya tunazohitaji tunapozeeka ni muhimu kuliko hapo awali. Kwa mfano, huduma hizi ni kumwona daktari au kwenda kituo cha afya au kliniki mara kwa mara, kupata dawa kwenye duka la dawa, huduma za wataalamu hospitalini, huduma za utengamao au afya ya akili, utunzaji katika kituo cha mchana, na utunzaji wa muda mrefu pamoja na msaada wa shughuli za kila siku nyumbani au katika makazi yenye huduma za utunzaji.

Shirika la Afya Duniani linafanya kazi na nchi kuandaa viwango vipya vya kimataifa vya huduma hizi ili kukidhi mahitaji mbalimbali ya watu wazee. Lengo ni kufanya huduma ziwe bora, salama zaidi na zenye heshima zaidi, kulingana na malengo yako, mambo unayothamini na mapendeleo yako.

Ili kufanya hivi vizuri, tunahitaji kwanza kusikiliza watu wanaotumia huduma hizi kila siku.

Uzoefu wako wa huduma za afya ni muhimu kwetu.

Tunahitaji kusikia hali yako halisi: mambo yaliyokwenda vizuri, yaliyokuwa magumu na unayotamani yabadilike unapotumia huduma za afya.

Utafiti huu unahusu nini

Tunahitaji kuelewa uzoefu wa wazee katika huduma za afya, pamoja na changamoto ulizopata, msaada uliopata au ambao hukupata, na mambo unayoona yanahitaji kuboreshwa. Majibu yako yatasaidia kuandaa viwango vya kimataifa vya huduma bora za afya kwa wazee, vikiongozwa na vipaumbele vya watu wanaohusika moja kwa moja.

Tunakualika ujibu maswali mengi kadiri unavyoweza. Hakuna majibu sahihi au yasiyo sahihi.

Nani anaweza kushiriki

Ili kushiriki, lazima utimize masharti yote mawili:

Una umri wa miaka 60 au zaidi

NA

Umetumia huduma za afya angalau mara moja katika miezi 12 iliyopita, kwa mfano kwenda kliniki, hospitali au kituo cha utunzaji wa mchana.

Ukipenda, unaweza kumwomba mtu unayemwamini akusaidie kujaza utafiti, kama mwanafamilia, rafiki, mtu wa jamii yako au mhudumu wa afya na utunzaji.

Ushiriki wako

Ushiriki ni wa hiari. Ili kushiriki, lazima uweze kuelewa taarifa za utafiti na kujaza dodoso katika mojawapo ya lugha zilizopo.

Unaweza kujiondoa wakati wowote kabla ya kutuma majibu, bila kutoa sababu. Majibu hukusanywa bila kutambua wewe ni nani na huhifadhiwa kwa siri.

Hatukusanyi taarifa zinazoweza kukutambulisha, kama jina, jina la ukoo au anwani ya barua pepe. Kwa hiyo hatuwezi kupata majibu yako binafsi baada ya kuyatuma. Hii ina maana kwamba hatuwezi kuyafuta baada ya kutuma utafiti.

Kwa kutuma utafiti, unathibitisha kuwa umesoma na kuelewa taarifa zilizo juu na unakubali kwa hiari kushiriki katika utafiti huu na kukusanywa na kuchakatwa kwa taarifa zako kwa madhumuni yaliyoelezwa.

Ikiwa unajaza dodoso hili kwa niaba ya mtu mzee, lazima uheshimu faragha yake na uweke taarifa zake binafsi na majibu yake kuwa siri.

Ukiwa na maswali au ukihitaji taarifa zaidi, wasiliana na Dkt. Yuka Sumi, afisa wa tiba katika Shirika la Afya Duniani, kwa barua pepe: sumiy@who.int.

Maswali yenye nyota (*) ni ya lazima na lazima yajibiwe ili kuendelea. Tunakuhimiza ujibu maswali mengine kwa ukamilifu na usahihi kadiri uwezavyo. Ukiacha swali bila jibu, ukichagua “Inayofuata” au “Wasilisha” utaona ukumbusho; hata hivyo unaweza kuendelea bila kujibu. Majibu ya sehemu zote ni muhimu kuelewa mahitaji, uzoefu na maoni ya watu wazee kuhusu huduma za afya na utunzaji katika mazingira mbalimbali.

Utafiti huchukua takribani dakika 30, ingawa muda unaweza kutofautiana kati ya watu.

Asante kwa dhati kwa muda wako na imani yako.